عارفه يعنى ايه يبقى عندك طفل واثق من نفسه؟ .. يعنى يبقى عندك طفل متكلم ولبق وجرئ ..
يعنى يبقى عندك طفل بيحترمك مش بيخاف منك علشان هتتضربيه ويقدر يناقشك ويناقش اى حد لحد مايفهم ويكون مقتنع كمان .
يعنى يبقى عندك طفل بيعتمد على نفسه في كل حاجة وانتى كمان تقدرى تعتمدى عليه ويزعل أوي لما تعملي له حاجة ممكن تساعديه بس لو هو طلب منك ..
يبقى عندك طفل صادق وحنون ومتفاهم .. يبقى عندك طفل قائد في جميع المواقف مش منقاد .. كلمته من رأسه فيها عقل وإتزان .. ومحدش يقدر يسيطر عليه او يجعله يفعل اشياء غير مقتنع بصحتها ..
يبقى عندك طفل قليل الاخطاء سعيد فى حياته ومسيطر عليها ..
طب كل ده جميل .. بس علشان يبقى عندك الطفل الرائع ده يبقى لازم تبقى إنتي كمان أم رائعه .. وتتعبى شويه علشان تحصدي الحجات الجميله دى فى ابنك بعد ما تقدري تنميها وتدعميها ..
يبقى المفروض علينا إحنا بقي كأمهات نعمل إيه؟؟ ..
اولا .. بلاش نقول للطفل الكلام السلبى والإنهزامي وخصوصا لما بتبقو متضايقين ..
يعنى ممنوع منعا باتا إنك تقولي له الأتي :
( انت غبى.. وانت رغاى.. وأصل انت كل حاجه بتعملها غلط.. وانت فاشل ومفيش منك فايده………. وهكذا )
الكلام ده مش بيربي أطفالنا .. لأ مع الأسف ..إحنا بنقوله علشان ننتقم بيه من الاطفال لانهم بيغلطوا .. مع ان غلطهم ده الطبيعى ماداموا اطفال .. لأنهم مازالوا فى سن التعلم .
يعنى لازم يغلطوا .. طيب هيتعلموا ازاى لو مش غلطوا وإنتي كأم أو حضرتك كأب صححت ليهم أخطائهم باللين والحنية والحب ..
وكمان فيه حاجة مهمة جدا كل أم وأب بيقعوا فيها .. بلاش عاده انكم اول ماتشوفوا حد من المعارف او الاصدقاء او الاقارب.. نروح قايلين له علطول علي كل الاخطاء اللى بيعملها الطفل ..
أو بفرضا لو الطفل عمل حاجه كويسه و حد مدح فيه تخرج الام بسرعة رهيبة وكانها بتنفي عنه تهمة قام بها .. أو يقوم الأب بالتعقيب ونفي كل ما هو طيب عن الطفل .. ويضحك ويقول “اصل انتى متعرفيهوش” .. ونفضل نحكى ونقول كل ما هو سئ عن طفلهم .
مش بس كده.. ده كل دا على مسمع من الطفل نفسه وساعات بيكون فى اطفال تانيه سامعين مساوئ طفلها كمان .. وبالتالي هيبعدوا عنه أقرانه لأنه طفل وحش ..
طيب ليه نعمل كده فى ولادنا ؟ .. ليه نكسفهم ونضايقهم ؟ .. ليه نولد جواهم كره للي حواليهم ؟
أرجوكي أيتها الأم وأنت أيها الأب بلاش .. بلاش خالص
لان ده له تبعاته وأثاره السلبية علي الطفل .. بيخلى الطفل منطوى وعنيف وكاره لك ولمن حوله جميعا.. وهيبقى فعلا عند ظنك فيه… مابيعملش أى حاجه صح وكذاب للأسف .
وكل ده هيكون رد فعل طبيعي على اللى سمعه منك واحراجه قدام الناس والاطفال وشعوره انه فاشل .. وبالتالي هيكون الطفل لازم ياخد منك اوامر لأنه مينفعش يفكر ولا يختار اى حاجه لانه للأسف بقى مقتنع ان أى حاجة هيختارها هاتكون غلط .. ما إنتي اللي وصلتيه لكده .
طب كل اللي فات ده خلاص فهمناه ومش هنعمله وهنتغير ونخافظ على شخصية ولادنا .. يبقى كده ابننا خلاص هيبقى واثق من نفسه .. ومش بيخاف ؟
١ — نمدح الطفل كتير جدا ولو عمل اى حاجه صح نشكره عليها ونشعره بأهميتها بالنسبه لنا .
٢ – نمدحه فى المجالس مع الاقارب والاصدقاء ونذكر حسناته وافعاله الجيده وكيف هو طفل رائع .
نتواكل عليه فى بعض الأحيان فى أمور تناسب سنه وقدراته حتى يستطيع اتمامها بشكل جيد.
٣ – نحكى له دايما عن مدى حبنا له وفخرنا به وأنه نعمة من نعم الله علينا واننا سعداء جدا لان الله رزقنا بطفل مثله .
٤ – نعتمد عليه فى بعض الاشياء كشراء بعض الاغراض التى نحتاجها او نطلب منه يفكرنا بميعاد معين ونخبره أصلنا خايفين ننساه وعلشان كده قلنا لك تفكرنا .. او نقول له يطلب بنفسه حاجة او اثنين لما نكون بنعمل شوبينج .. او نخليه يحاسب البائع ونحكي له قد ايه احنا سعداء وفخورين به عشان قدر يعمل كل الحاجات دى .. أو لو كنا في مواصلات هو اللي يحاسب ويتكلم .. صدقيني هيكون فرحان قوي .
٥ – اذكرى دائما فى بدايه الكلام انك واثقه من انه قادر ان يفعل كذا وكذا عشان تعطيه طاقه وحماسه ليكون عند حسن ظنك بيه.
٦ – لما يخطئ طفلك و دا امر طبيعى جدا ..نمدح الجهد الذى بذله ونشجعه على بذل المزيد من الجهد فى المرات القادمه .
٧ – احكى له عن مواقف حصلت معاكي وانتى صغيره لأن دى طريقه رائعه لتحفيز الاطفال وإزاي إنتي واجهتي المواقف دي لأنهم دايما بيحبوا سماع حكايات عن طفوله والديهم .
هااا مين قرر يتغير .. وهيخلى ابنه يبقى واثق من نفسه ؟
وإفتكروا .. إن أولادنا هما نور عينينا .. وحياتنا اللي تعبنا فيها ..
